GÆÐATRYGGING

Spurt & Svarað

ALMENNT UM ÖR-NÁMSKEIÐ STARFSFRAMA 

SPURT: Hverjir geta skráð sig á námskeið Starfsframa?

SVARAÐ: Einstaklingar á öllum aldri eru velkomnir á námskeið Starfsframa, án tillits til aldurs, menntunar eða fyrri starfsreynslu. Námsefnið er sett fram á einfaldan og skilvirkan hátt svo allir geta skilið það og tileinkað sér þær aðferðir sem kenndar eru. Reyndari einstaklingar geta nýtt sér námskeið Starfsframa til að ná áttum, setja sér stefnu og koma sér af stað í að byggja sér starfsferil eða leita að vinnu með nýjum og ferskum hugmyndum.

SPURT: Hvar fara námskeiðin fram?

SVARAÐ: Öll námskeið Starfsframa eru fjarnámskeið, flutt rafrænt í rauntíma. Það þýðir að það er engin upptaka sem þú getur horft á, heldur er þér boðið á fjarfund með leiðbeinanda sem talar við þig í eigin persónu. Þú getur þannig haft  bein samskipti við leiðbeinanda á meðan fræðslan fer fram og eftir að henni lýkur. 

SPURT: Hvernig virkar þjónustuferli Starfsframa?

SVARAÐ: Starfsframi leitast við að hafa þjónustuferlið eins öruggt og þægilegt og kostur er. Þjónustuferlið hefst þegar þú skráir þig á námskeið og endar þegar námskeiði lýkur: 

1. Þú skráir þig á námskeið og velur þá dagsetningu sem hentar þér.

2. Þegar krafa hefur verið greidd í heimabanka færðu tölvupóst með fundarslóð.

3. Þú færð tvær áminningar fyrir námskeiðið í tölvupósti, sú fyrri kemur viku áður en námskeiðið hefst og sú seinni kemur sólarhring áður.

4. Þú mætir á fundinn tímanlega, eða minnst 5 mín. áður en hann hefst svo ekkert verði til að trufla upplifun þína og þú missir örugglega ekki af neinu.

5. Um leið og námskeiðið hefst færðu aðgang að námsefnavef sendan á tölvupósti. 

6. Þú fylgist með fræðslunni í gegnum fjarfundinn, punktar hjá þér eftir þörfum, og spyrð spurninga sem kunna að vakna hjá þér.

7. Á lengra námskeiðinu er gefið 10 mínútna hlé þegar tíminn er hálfnaður.

8. Hvert námskeið er í 4-5 hlutum og að loknum hverjum hluta er spurningahlé í nokkrar mínútur til að þátttakendur geti spurt út í efnið áður en lengra er haldið.

9. Þegar námskeiðinu lýkur er leiðbeinandinn áfram inni á fundinum í allt að 30 mínútur til að svara spurningum frá þátttakendum sem vilja dýpka skilning sinn á námsefninu eða fá leiðsögn um persónulega aðlögun þess. Athugið að þetta eru ekki einkasamtöl heldur opin öllum þátttakendum sem hafa áhuga á að sitja áfram og hlusta á og taka þátt í frekari umræðum um efnið. Sé óskað persónulegrar ráðgjafar í einkasamtali er hægt að bóka tíma í persónulega ráðgjöf.

10. Aðgangur að námsefnavef er opinn ævilangt svo hver og einn þátttakandi getur haldið áfram að notfæra sér námsefnið og allar framtíðar uppfærslur á sínum eigin hraða, út lífið.

​

SPURT: Þarf ég einhvern sérstakan tölvubúnað eða tæknikunnáttu til að notfæra mér námskeið Starfsframa?

SVAR:  Stutta svarið er NEI, þú þarft engan sérstakan búnað eða kunnáttu til að geta tekið þátt í námskeiðum Starfsframa, umfram það sem flestir hafa aðgang að nú þegar. Námskeiðin eru flutt rafrænt á fjarfundi og því þarftu snjalltæki eða tölvu til að komast á netið og opna slóðina á fundinn. Þú þarft ekki að hlaða niður neinum sérstökum hugbúnaði til að komast inn á fundinn, Starfsframi notar Teams og þegar þú smellir á hlekkinn í póstinum færðu val um að opna hann í vafra eða smáforriti. Ef þú ert ekki með Teams appið þá velurðu að opna í vafra. Til að geta nálgast námsefnið þá þarftu að komast á netið og skrá þig inn á öruggt vefsvæði í vafra með netfanginu sem þú notaðir til að skrá þig á námskeiðið. Þá þarftu vitanlega að vera tengdur við netið til að allt þetta virki.

​

Á námskeiðinu Markviss starfsferill læra þátttakendur aðferð þar sem einföld stílabók dugar sem verkfæri. Þátttakendum er að sjálfsögðu frjálst að nota stafrænar lausnir ef þeir vilja það frekar og er það persónulegt val hvers og eins. 

​

Á námskeiðinu Árangursrík atvinnuleit fá þátttakendur leiðbeiningar um ferli sem nauðsynlegt er að vinna að stórum hluta til í tölvu. Í dag getur enginn stundað atvinnuleit án þess að hafa aðgang að tölvu, svo ef þú hefur skráð þig á þetta námskeið, þá er tölvuleysi eflaust ekki að hrjá þig. Athugaðu þó að þú getur alltaf setið námskeiðið og komist í námsefnið þó þú sért aðeins með snjallsíma eða spjaldtölvu, en til að geta unnið öll verkefnin sem árangursrík atvinnuleit krefst, muntu á einhverjum tímapunkti þurfa að komast í tölvu.

Á námskeiðinu færðu afhent sniðmát að Word og Excel skjölum sem þú getur nýtt þér til að hjálpa þér í atvinnuleitinni. Ef þú ert ekki með þessi forrit á tölvunni þinni þá geturðu opnað þau í Google Docs sem er frír hugbúnaður sem gerir það sama. Það er þó engin skylda að nota þessi skjöl, sumir þátttakendur kunna að eiga sín eigin skjöl sem þeir vilja halda áfram að nota og þá er það bara sjálfsagt. Einnig er hægt að notast við frían hugbúnað eins og Canva í sama tilgangi.

​

SPURT: Ef mig langar að taka fleiri en eitt námskeið, hvaða námskeið ætti ég að taka fyrst?

SVARAÐ: Fyrst tekurðu Markviss starfsferill þar sem þú skilgreinir draumastarfið þitt og býrð þér til starfsferilsáætlun. Í framhaldinu tekurðu svo Árangursrík atvinnuleit til að læra aðferðir sem styrkja þig í atvinnuleitinni.

​

SPURT: Hvað ef ég veit ekki hvað draumastarfið mitt er?

SVARAÐ: Ekkert af námskeiðum Starfsframa krefst þess að þú vitir hvað draumastarfið þitt er. Ef þig langar að komast að því þá getur Starfsframi aðstoðað þig við það með námskeiðinu Markviss starfsferill. Ef þú vilt bara komast í nýja vinnu, þá getur Starfsframi aðstoðað þig við að ná árangri í atvinnuleitinni með námskeiðinu Árangursrík atvinnuleit.

​

​SPURT: Ábyrgist Starfsframi að ég finni draumastarfið mitt?

SVARAÐ: Því miður þá getur Starfsframi ekki ábyrgst neitt þegar kemur að því sem hefur með þig og þína persónulegu hagi að gera. Þú þarft sjálfur að uppgötva hvert draumastarfið þitt er eða ákveða hvað þú vilt vinna við næstu árin og í framtíðinni. Starfsframi tekur engar slíkar ákvarðanir fyrir þig, heldur lætur þér í té verkfæri sem gera þér kleift að taka réttu ákvarðanirnar fyrir sjálfan þig.

​

​SPURT: Ábyrgist Starfsframi að ég nái árangri í atvinnuleit?

SVARAÐ: Það er margt sem þarf að smella saman til að atvinnuleit beri árangur og ekkert af því er undir Starfsframa komið. Hins vegar veitir Starfsframi þér allt sem þú þarft til að skipuleggja og framkvæma árangursríka atvinnuleit og því betur sem þér tekst að tileinka þér þær aðferðir og beita þeim á þínar aðstæður, því fyrr mun árangurinn skila sér. 

​​

SKRÁNING OG GREIÐSLUR

SPURT: Hvernig skrái ég mig á námskeið?

SVARAÐ: Þú einfaldlega fyllir út skráningarformið og velur námskeiðið sem þú hefur áhuga á. Þú færð reikning og kröfu í heimabanka innan sólarhrings og þegar krafan er greidd færðu staðfestingu á námskeiðinu með fundarhlekk. Einfaldara getur það ekki verið!

​

SPURT: Hvernig greiði ég fyrir námskeiðið?

SVARAÐ: Að svo stöddu er aðeins ein greiðsluleið í boði hjá Starfsframa sem er með greiðsluseðli, eða kröfu sem berst í heimabanka innan sólarhrings frá bókun. Hægt er að skipta greiðslum en einungis á þá mánuði sem eftir eru þar til námskeiðið hefst sem þú bókaðir þig á. Ef þú vilt skipta greiðslum þá sendirðu póst á thjonusta@thjonusta.is með fyrirsögninni "SKIPTA GREIÐSLUM" um leið og þú ert búinn að bóka þig á námskeið.

​

SPURT: Er hægt að fá endurgreiðslu ef ég hætti við eftir að hafa greitt?

SVARAÐ: Já en það fer eftir því hversu snemma þú afbókar, hversu mikil endurgreiðsla fæst .Það er alltaf í boði að færa sig á aðra dagsetningu án endurgjalds, svo framarlega sem sú beiðni berst minnst einum sólarhring áður en námskeiðið hefst sem þú ert búinn að bóka þig á. Nafnabreytingar eru einnig í boði svo þú getur látið einhverjum öðrum eftir þitt pláss. Þú getur kynnt þér þetta nánar í afbókunarskilmálum.

​​

NÁMSKEIÐ OG INNIHALD

SPURT: Hversu lengi standa námskeiðin yfir?

SVARAÐ: Markviss starfsferill tekur 60 mínútur og Árangursrík atvinnuleit tekur 120 mínútur. Á lengra námskeiðinu er 10 mínútna hlé þegar námskeiðið er hálfnað svo þátttakendur geti teygt úr sér, skroppið á salerni eða  fyllt á kaffibollann. Að báðum námskeiðum loknum verður leiðbeinandi til viðtals í allt að 30 mínútur til viðbótar fyrir áhugasama. 

​

SPURT: Hvað felst í námskeiðinu Markviss starfsferill?

SVARAÐ: Á þessu námskeiði lærir þú að búa þér til starfsferilsáætlun með því að framkvæma sjálfsmat, skilgreina draumastarf og nauðsynlega eða gagnlega menntun. Þú lærir svo að nota upplýsingarnar sem þú hefur safnað til að setja þér stefnu sem skilgreinir bestu leiðina að takmarki þínu og að lokum hvernig þú raungerir stefnuna með markmiðasetningu. Nánari upplýsingar um Markviss starfsferill.

​​

SPURT: Hvað felst í námskeiðinu Árangursrík atvinnuleit?

SVARAÐ: Á þessu námskeiði lærir þú að undirbúa og skipuleggja atvinnuleit til að hámarka líkur á árangri og þú færð ýmis verkfæri í hendurnar sem hjálpa þér af stað í atvinnuleitinni, gera þér kleift að viðhalda markvissri áætlun og veita þér góða yfirsýn yfir atvinnuleitina þína. Þú lærir aðferðir sem auka hagræðingu við atvinnuleit, spara þér tíma við gerð umsókna og bæta sjálfstraustið í atvinnuviðtali, og margt fleira. Nánari upplýsingar um Árangursrík atvinnuleit.

​

SPURT: Þurfa þátttakendur að vinna einhver verkefni á námskeiðunum?

SVARAÐ: Nei, námskeiðin eru einungis til fræðslu um notkun efnisins og er hlutverk leiðbeinanda að gera þér kleift að nota námsefnið sjálfstætt og á eigin spýtur að námskeiðinu loknu og í framtíðinni. Það eina sem þú þarft að gera er því að hlusta vel og punkta hjá þér ef það vakna einhverjar spurningar, og nýta svo spurningahléin á milli námskeiðshluta og umræðutímann að námskeiði loknu til að fá frekari upplýsingar frá leiðbeinanda um hvað sem kann að vera óljóst ennþá.

​

FJARFUNDIR OG UPPTÖKUR

SPURT: Hvernig fer fjarfundur fram?

SVARAÐ: Þú færð senda vefslóð á fjarfund þegar þú skráir þig (það er til að þú getir prófað hlekkinn tímanlega til að ganga úr skugga um að hann virki og að allar þínar stillingar séu eins og þú vilt hafa þær) og aftur daginn áður en námskeiðið hefst (svo þú þurfir ekki að fara að leita aftur að slóðinni).

Námskeiðið hefst á auglýstum tíma á slaginu og því nauðsynlegt að þú sért búinn að ganga úr skugga um að hlekkurinn virki í tækinu þínu og að hljóð og mynd séu rétt stillt svo þú heyrir og sjáir, og getir tjáð þig við leiðbeinanda. Byrjað er að hleypa inn á fundinn 5 mín. áður en námskeiðið hefst. Þátttakendur eru hvattir til að mæta tímanlega til að missa ekki af neinu, en ekki er hægt að fá upptökur af námskeiðum eftir á.

​

SPURT: Er hægt að fá upptökur af námskeiðum?

SVARAÐ: Nei. Námskeið í rauntíma eru ekki tekin upp og ekki hægt að fá námskeið á upptöku að svo stöddu en rafræn námskeið munu verða í boði síðar. Ef þú hefur áhuga rafrænu námskeiði á upptöku, þá geturðu skráð þig þá á póstlista til að fá fréttir af því þegar sú þjónusta er kynnt.

​

TÆKNILEG AÐSTOÐ

SPURT: Hvað gerist ef ég lendi í tæknilegum vandræðum með fjarfundinn?

SVARAÐ: Það er engin eiginleg tækniþjónusta á fjarfundum en leiðbeinandi mun gera sitt besta til að finna út úr því með þér ef eitthvað er ekki að virka rétt hjá þér. Það er þó takmarkaður tími til þess því leiðbeinandi þarf að hefja námskeiðið tímanlega á slaginu á auglýstum tíma.

Til að draga úr líkum á tæknilegum vandræðum þátttakenda á námskeiðunum, þá færðu sendan fundarhlekk um leið og skráning þín hefur verið staðfest svo þú getur byrjað á því strax að prófa hlekkinn og skoða þínar stillingar. Ef það gengur vel og engin vandamál koma upp ertu að öllum líkindum ekki að fara að lenda í neinum tæknilegum vandræðum á fundinum. Ef hlekkurinn virkar ekki hjá þér þá þarftu tafarlaust að senda línu á thjonusta@thjonusta.is með fyrirsögninni: FUNDARHLEKKUR ÓVIRKUR, og muntu þá fá sendan nýjan um hæl.

Fjarfundarsvæðið er opnað 15 mínútum áður en námskeiðið hefst til að þátttakendur geti mætt tímanlega til að prófa sinn búnað og ganga úr skugga um að allt virki rétt, og fá aðstoð ef þörf er á, áður en námskeiðið hefst.

Í allra versta falli ef ekki næst að leysa tæknivandandamál tímanlega áður en námskeið hefst þannig að þú missir af námskeiðinu eða upplifun þín skerðist verulega, þá stendur þér til boða að endurtaka námskeiðið síðar án endurgjalds. Ef það gerist hjá þér, sendu þá línu á thjonusta@thjonusta.is með fyrirsögninni: TÆKNIVANDAMÁL Á NÁMSKEIÐI. Láttu fylgja með dagsetninguna sem þú hefur valið fyrir endurtekningarnámskeið.

​

SPURT: Er hægt að fá aðstoð við að setja upp Teams áður en námskeiðið hefst?

SVARAÐ: Þú þarft ekki að setja upp Teams á tækinu þínu til að geta tekið þátt í  námskeiðinu því Teams virkar líka í vafra. Ef Teams er ekki til staðar í tækinu þínu þegar þú smellir á fundarhlekkinn þá kemur upp valkostur um að sækja Teams eða opna slóðina í vafra. Ef þú vilt ná þér í Teams þá velurðu þann kost en ef þú vilt ekki hafa forritið á þínu tæki, þá velurðu að opna í vafra.

​

PERSÓNULEG RÁÐGJÖF OG SÉRKJÖR

SPURT: Býður Starfsframi upp á persónulega ráðgjöf eða einkatíma?

SVARAÐ: Já, öll námskeið Starfsframa eru í boði sem einkatímar og bætast þá 30 mínútur við tímann. Einnig er hægt að bóka persónulega ráðgjöf til að fá aðstoð með starfsferilsáætlun, ferilskrá, kynningarbréf, atvinnuleit eða aðra þætti sem námskeið Starfsframa fjalla um. Bæði einkatímar og persónuleg ráðgjöf fara fram rafrænt í rauntíma á fjarfundi eins og námskeiðin. Upplýsingar um verð og skilmála er að finna í verðskrá.

​

SPURT: Býður Starfsframi upp á sérkjör fyrir hópa?

SVARAÐ: Já, hópar geta bókað einkatíma fyrir ótakmarkaðan fjölda þátttakenda, en lágmarksfjöldi er 10 þátttakendur. Hóptímar fara fram rafrænt í rauntíma á fjarfundi eins og námskeiðin. Einnig er hægt að bóka staðbundið námskeið í húsakynnum hópsins. Upplýsingar um verð og skilmála er að finna í verðskrá. 

​

AÐGANGUR OG PERSÓNUUPPLÝSINGAR

SPURT: Hvað þýðir "ævilangur aðgangur" að námsefni?

SVARAÐ: Þátttökugjald námskeiða innifelur ævilangan aðgang að námsefni fyrir þau námskeið sem þú hefur skráð þig á, ásamt öllum verkfærum, hjálpargögnum og framtíðar uppfærslum. Þetta þýðir einfaldlega að aðgangi þínum verður aldrei lokað eins lengi og Þjónustuveitan er enn starfandi, og svo framarlega sem netfangið sem þú skráðir þig á námskeið með sé ennþá virkt. Skyldir þú tapa aðgangi þínum af einhverjum ástæðum geturðu hvenær sem er haft samband og óskað eftir að fá aðganginn endurvirkjaðan.

​

SPURT: Hvaða persónuupplýsingum þarf Starfsframi aðgang að og í hvaða tilgangi?

SVARAÐ: Þegar þú skráir þig á námskeið þá óskar Starfsframi eftir nauðsynlegum upplýsingum til að geta veitt þér þjónustuna, sem er fornafn og netfang ásamt kennitölu til að geta stofnað kröfu í heimabanka og gefið út reikning. 

Til að nálgast námsefnið þarftu að skrá þig inn á öruggan námsefnavef með netfanginu þínu til að auðkenna þig, því efnið er læst öðrum en þeim sem setið hafa námskeiðin. Starfsframi geymir því netfangið þitt ævilangt, eða eins lengi og þú vilt hafa aðgang að námsvefnum. Vefur Starfsframa býður ekki upp á "Mitt svæði" svo þátttakendur geta ekki búið sér til reikning á námsefnavefnum og engin verkefnavinna fer fram á á vefsvæðum Starfsframa. Þátttakendur vinna sín verkefni á eigin tölvum og eru sjálfir ábyrgir fyrir öryggi eigin gagna.

​

ÖNNUR ÞJÓNUSTA

​SPURT: Býður Starfsframi upp á námskeið fyrir fyrirtæki?

SVARAÐ: Ör-námskeið Starfsframa gera þátttakendum kleift að bæta sig á persónulegum sviðum sem tengjast ekki störfum þeirra, heldur starfsferlinum. Með öðrum orðum eru námskeiðin ekki þess eðlist að þau gagnist fyrirtækjum heldur eru þau alfarið hönnuð og þróuð fyrir einstaklinga. Félagasamtök geta þó tekið sig til og bókað hópa á sérstökum kjörum, sjá nánar um einkatíma, hóptíma og persónulega ráðgjöf.

​​

SPURT: Er hægt að fá námskeiðin á öðrum tungumálum?

SVARAÐ: Að svo stöddu eru námskeiðin einungis í boði á íslensku og námsefnavefurinn er eingöngu til á íslensku. Það stendur þó til að bæta við enskri útgáfu af námsefnavef og þegar hann er tilbúinn verða námskeiðin einnig í boði á ensku. Ef þú vilt fá fréttir af því þegar enska útgáfan kemur út geturðu skráð þig á póstlista. 

FANNSTU EKKI SVAR VIÐ ÞINNI SPURNINGU?

Sendu línu á thjonusta@thjonusta.is með fyrirsögninni SPURT og látu spurningar þínar fylgja með. Þú færð svar um hæl!​​​​​​

​​​​​